मीठी'क नानी गाम

देखलौं हे मीठी दाइ नानी गाम तोर,
हुनका दरबज्जा पर दू दू टा मोर I मीठी....

चूहा आ बिल्ली कुदै छनि घर मे,
नानी आ मौसी करै छथि सोर II मीठी......

तीनटा बकड़ी छन्हि बान्हल दरबज्जा पर,
गै छन्हि हरही एक पकड़ने छथि डोर I मीठी.....

कुदै छै मुसबा आ पकडै बिलाड़ ओकरा,
हडविर्रो मचा देलकनि आइ भोरे-भोर II मीठी.....

कूकुर एक कटहा छन्हि, छोडने छथि छुट्टा ओ,
पाहुन देखि भूकै छन्हि, भागनि देखि चोर I मीठी....

एक दिन सुजय बाबू साँझ मे पहुँचला त',
तत्ते ओ भुकलनि जे भ' गेलनि भोर II मीठी.....

एक दिन मिठी-तासु जाई छथि नानी गाम,
बान्हइ छथि कुतबा के पकडै छथि डोर I मीठी....

कतबो ओ कुतबा भागक परयास केलक,
सकल नै भागि ओ छोडलनि ने छोर II मीठी.....

पकडै छथि नांगरि दुनु मुसबा आ बिल्ली के,
ऐंठइ छथि कान त' चिचिआयल ओ जोरI मीठी...

डण्टा देखाक' डेरेलनि सब जानवर के,
आब ने कहियो क्यो मचबै छन्हि सोर II मीठी....