Friday, July 29, 2016

सुखी भाइ के मोनक भाव

सुखी भाइ, 
अति निर्धन किसान, 
लगभग भूमिहीन, 
गूड़क कारोबारी, 
कुसिआर कीनिक' पेड़ै छथि I 
बड़का कड़ाह मे,
रस के खौला क’, 
गूड़ बनबै छथि I

भोर स’ साँझ तक,  
बच्चा सब गूड़ लूझक लेल, 
घेरने रहैछ I 
भरिदिन मोन चङ, 
सुखी भाइ हरदम, 
हल्ला करिते रहैछ,
हल्ला स' टोल परेसान !

ओही रस्ते पठशल्ला पर जाइत काल,
सुखी भाइ के देखै छी; 
पुछलिअनि- 
-“ भाइ! आइ एकदम सन्नाटा अछि,
 एकोटा बच्चा के नै देखै छी, 
आइ त’ मोन खूब हल्लुक हैत ! "

“ की मोन हल्लुक हैत ! 
मोन होइछ कोनो तीर्थ-बर्थ चलि जाइ I "
“ से की भाइ ! 
की भेल? 
एना किऐक ? "
“ अरे अहुना कहूँ भेलैक अछि ? 
पढ़ाइ अनिवार्ज क’ देलकै, 
इस्कूल गेनाइ जरूरी क’ देलकै, 
हाजिरी बनेनाइ जरूरी क’ देलकै, 
हम सब कोन इस्कूल गेल रही, 
अपन गुजर चलबै छी कि नहि,
कोनो सरकार खर्च दैऐ ? 
सब बच्चा आब भोर मे जाइत अछि त’ एके बेर साँझ मे अबैत अछि, 
तै पर स’ होमवर्क ! 
आब त’ इमहर कियो तकबो ने करैछ I 
बच्चा स’ बेसी ओजन बस्ते के, 
दिनभरि इस्कूल में पढू, 
साँझ मे पढू, 
फेर भोर मे पढू; 
ईहो कोनो बात भेलै? 
खेल-कूद के कोनो बात नै, 
बच्चा नै भेल मशीन भ’ गेल, 
हद्द भ’ गेल ! 
बच्चा सब के नै एने जिनगी नीरस लगैछ ! 
हमर बस चलैत त’ सब इस्कूल मे ताला लगा दितिऐ I "


देखू सुखी भाइ के मोनक भाव ! 
हम बुझै छलौं, 
ओ बच्चा सब स’ परेसान रहै छथि, 
मुदा हुनकर अन्दर के भाव देखि, 
नत-मस्तक छी I 
माफ़ करब सुखी भाइ! 
शत्-शत् नमन !          

Thursday, July 28, 2016

बौकी के गोपी रूप


 गामक इस्कूल लग, कच आ मुरही ल,’ ठीक चारि बाजल कि, बौकी बैसि जाइत छल I           भुक्खल बच्चाक झुण्ड, छुट्टी पबैत देरी, हुरदंगी मचबैत सब, ल’ग मे जुटि जाइत छल II

 मुरही संग दू टा कच, हंसि-हंसिक’ सबहक कर, बौकी फ़टाफ़ट क’, दोना द’ दैत छल I         कूदि-कूदि बच्चा सब, अपन-अपन हाथ बढ़ा, झट-पट मे बौकी स’, दोना ल’ लैत छल II

  छोट-छोट ढुनमा-मुनमा, सगरदिन भुक्खल सब, हाथ मे दैत देरी, चट स’ खा लैत छल I          फेर स’ हाथ पोछि, झुण्ड मे फेर शामिल भ’, फेर एकटा नव दोना मे, फेर ल’ लैत छल II

  अहिना हरेक बच्चा, दू-दू आ तिन-तिन बेर, हंसि-हंसि क’ दोना ल’, खूब खा लैत छल I         मुदा पाइ एके बेरक, बच्चा सब दैछ आ, हंसी-खुसी बौकी झट, चुप्पे राखि लैत छल II

 बच्चा आ बौकिक ई, हंसी-खेल क्रय-विक्रय, अही क्रमें लगातार, चलैत रहल तावत धरि I       संगी सबकेर संग, हमहूँ ने पास क’ क’, निकलि नहि गेल रही, इस्कुल स’ यावत धरि II

बहुत बरख बितला पर, अपना दरबज्जा पर, बात मे मशगुल हम, बैसल छी मीठी संग I        देखै छी बौकी के, माथ पर पथिया लय, हमरे दरबज्जा दिस, आबि रहल पोती संग II

“बाल्यकालक संस्मरण, इस्कूल के बच्चा सब, कच आ मुरही, की आहाँ के याद अछि?          हम सब अनेक बेर, खा-खा क’ एके बेरक, पैसा जे दैत रही, ठकलहु से याद अछि?”

“ठकितै की हमरा क्यो, तोरा सबहक चलकपनी, खेल-बेल खूब हम, सबटा बुझैत छलियौI        तोरे सबह’क बलें, पक्का के घर बनलै, बेटी के ब्याह क’ क’, खेतो खूब कीन लेलिऔ II

ठकेलैं रे तोंही सब, ह’म त’ कमेलिऔ खूब, बच्चा सबहक संग, खेलो खेलेलिऔ रे I             सुइद मे रे बौआ सुन, क’च आ मुरही पर, गोकुल के ग्वालिन के आनंदो लेलिऔ रे” II


आइ अइ अनपढ़ के, अन्दर के भाव देखि, लेखनी अवरुद्ध आ आत्मा विभोर अछि I           
बौकी के दर्शन आ नमन गोपी-भाव के क’, बाल्यकाल याद क’, मोन सराबोर अछि II         
मोन सराबोर अछि ....II    

Wednesday, July 27, 2016

मोन होइ अछि

मोन होइ अछि झड़ना पहाड़ पर घुमि-फिरि अवितौं,       नदी-समुद्रक दर्शन सदिखन करिते रहितौं I        पोखरि लग मे जाय माछ के मुरही दैतौं,             पार्क महक चिड़िया-चुनमुन के अन्न खुअवितौं I      जाय प्रयागक संगम मे डुबकी द’ अबितौं,         वृन्दावन मे जाय बिहारिक दर्शन करितौं II   

सुखवा


जहिना नाम छलै सुखवा,                          ओ लखना के सुखदाता छल I                    कियो नै बूझि सकल लखना के                    ओ नहि सोदर भ्राता छल II

बाल्यकाले स’ देखी,                                  अग्रज सदृश सुखवा रहै छल I                  एके रंग भोजन, वसन आ                        शयन संगहि संग करै छल II
                                                    
तात लखनक जखन मुइला,                        एक वरखक ओ छलै I                              भार घर-परिवार सब,                                सुखावाक माथा पड़ि गेलै II


जेठ भायक रोल भेटलै,                               सोदरो स’ बढिक’ केलक I                         सर-कुटुम्बक संग खेतक-                           भार, हाट-बजार लेलक II

जखन दुनिया-ज्ञान भेल आ,                         सांसारिकता बुझ’ लगलहुँ I                       आन जातिक लोक थिक ई,                       तखन सेहो बुझ’ लगलहुँ II

वाह! हमर समाज सुथगर,                          नीक बुधि कहियो ने दै अछि I                  मुदा जातिक ज्ञान त’,                              बच्चे मे सबके करा दै अछि II

लखन केर सुखबा पछिलका-                जन्म-ऋनिया बुझि पडै अछि I                  अइ जनम मे भक्ति-भावें,                          सुइद संग चुकता करै अछि II


जाति-धर्म विहीन, केवल                          भक्ति-भावें क’ रहल अछि I                      जाति पोषक तत्व के,                              कसिक’ चमेटा द’ रहल अछि ।।                कसिक’ चमेटा.....।।
************************

Monday, July 25, 2016

हाथी


हाथी राजा कत’ जाइत छी,                                       धरती के हिलबैत जाइत छी,                                      धूरा के उडबैत जाइत छी,                                         गाछ बिरिछ के खाइत जाइत छी I
                                                          खाम्ह सनक अछि जांघ अहाँ के ,                                 पंखा सन  के कान अछि I                                         पर्वत सनके देह भरिमगर,                                   आँखि, पूँछ बड छोट अछि II                                                    
                                                           सूंढ़ अहाँ हिलबैत रहै छी,                कान खूब चलबैत रहै छी,                सांस सेहो सूंढे स’ लै छी,                सूंढे स’ जल खूब पिबै छी I


 दू टा दांत देखावक लेल अछि,                                      अलग दांत खयबाक लेल अछि,                                 बहुत चाव स’ ईख खाइत छी,                                  बांस पात संग धान खाइत छी I

  हमारा घर पर अबिऔने,                                      लड्डू-पेड़ा खैऔ ने I                                         पीठ पर चढ़बिऔ ने,                                       
 मीठी के घुमबिऔने                                                                                                                              हाथी छथि हितकारी मनुजक,                                     जुनि हिनकर अपकार करी I                                     विघ्नहरक गणपति स्वरुप ई,                        सतत् हिनक उपकार करी II                                   सतत् हिनक.......II   

Sunday, July 24, 2016

भालू-1


धोती-कुरता-टोपी धारी                                                भालू मीठिक घर आयल I                                                 रूप ओकर छै कारी धुद्धुर,                                             स्वेत वस्त्र सुन्दर लागल II
भालू लग मे दौडै जखने,                                                बच्चा सब झटपट भागै I                                                 नाच ओकर अलबेला छम-छम ,                                      मनभावन सबके लागै II
घर मे छन्हि नकली भालू पर,                                         तैयो ओ भयभीत रहै छथि I                                          आइ पडल पाला असली स’,                                                दादा पाछू नुका रहल छथि II
नाच ख़तम क’ थारी ल’ क’,                                                     सबस’ पैसा मांगि रहल अछि I                                       मीठी सेहो  देलनि पैसा,                                              मुदा ने तैयो मानि रहल अछि II

कतबो भगवथि मुदा ने मानल,                                             भोज बिना खेने नै जेतैन I                                            रसगुल्ला, लड्डू आ पेडा,                                           आइ एतय सबटा खेतैन II

रीछ-भालु के जुनि क्यो मारी,                                               छथि ई संग त’ हैब सफल I                                              हिनके सबहक बलपर रघुबर,                                              रावण पर जय पाबि सकल II    

भालू


एकटा भालु                                                         ऐल मीठिक दरबज्जा पर                                          पहिरने अछि कुरता पायजामा                                     माथ पर टोपी सेहो छै                                            असली भालु अछि कि नै                                          विसवास नै होइछ I

  मदारी नै छैक                                                मुदा ई खूब भाषण दैछ                                          गरीबी हटायब......                                              विसवास नहि होइछ I

 जंगल मे रहितै त’                                                  किछु कालक लेल                                                  विसवासो क’सकै छलहुँ                                                    कहीं असलीए ने हुऐ                                              दिन देखारे विना मदारी के                                            दरबज्जे-दरबज्जे घुमैत भालु के देखि                                विसवास नहि होइछ I

Saturday, July 23, 2016

बानर


दादा आ दादिक संग मीठी,                                                अरुण गिरि पर चढ़ि रहल छथि I                                           डैड-मम्मी आर चाचू,                                                   सेहो संगहि बढि रहल छथि II

भरल बानर यूथ सगरो,                                                 सब बहुत झगडा करै अछि I                                            खूब कूदय आर फानय,                                                दृश्य अति सुन्दर लगै अछि II

पहुँचला स्कन्द आश्रम,                                                   ध्यान मे सब लोक भिडि गेल I                                           उठै छथि त’ एक बानर,                                                 कान्ह दादाजीक चढ़ि गेल II

सब गुफा-विरुपाक्ष पहुँचल,                                                 ओतय पुनि-पुनि ध्यान केलनि I                                             संत एक मीठिक कर,                                                     केराक दू छिम्मी देलनि II

                                                                            दिवि बानर झुण्ड दिसक’,                                                  दुहू केरा के फेकै छथि I                                                    मारि बझि गेल बानरक बिच,                                               एक दोसरा स’ छिनै छथि II

थिका बानर मनुज-पूर्वज,                                                  करी श्रद्धें भोज्य अर्पण I                                                  जाहि विधिएँ करै छी सब,                                           भक्ति-भावें पितर तर्पण II


राम बानर केर बल पर,                                                   राक्षसक संहार केलनि I                                                  हनुमतक पूजाक फल स’,                                                  मनुज के उद्धार हेतनि II      

Friday, July 22, 2016

कूकुर


मीठिक नानी कुतबा पोसली,                                       कूद-फान ओ खूब करै छनि I                                     चोर देखि सुटकाबय नान्गरि,                                       पाहुन पर ओ खूब भुकै छनि II

बाहर स’ ए’ली नानी त’,                                         कुतबा प्यार जनाबक लेल-                                         उछल-कूद करिते-करिते चट,                                    नानी के कनहा चढ़ि गेल II

चाटय नानी के साड़ी त’,                                          ओ अतिशय खिसियाय जाइत छथि I                              कसिकय डांट पडल कुतवा के,                                  कोना मे जा नुका जाइत छथि II
            
  बाट-बटोही सब पर भूकय,                                    कुतबा त’ अछि अतिशय शातिर I                           नानिक घर मे ख़ाक,’ दौड़य-                                      दोसरक दूरा हगबा खातिर II

बच्चा सब स’ खूब पटै,                                       खेलय मीठी-तासुक संग भरिदिन I                               मीट-भात खा-खा क’ अतिशय,                                आँखि मूनि क’ सूतय सबदिन II

बहय बड़द पर बिना काज के,                                     कूकुर देखू हकमि रहल अछि I                                    स्वान जाति के निंद्रा, दृग के-                                   खन मूनय खन खोलि रहल अछि II
                                                               अपना जातिक अछि ई दुश्मन,                                 देखिते दरबज्जा स’ कूदल I                                     खूब खिहारय लागल ओकरा,                                   दम्म लगाकय जोड़ें भूकल II

कुतबा अछि अतिशय कटाह,                                        जे छेडथिन्ह तिनका नहि छोड़तनि I                               मात्र सात टा मोटका सुइ,                             ढ़ोंढ़ी मे तिनका लेबहि पड़तनि II
                                                               मनुज  के पकिया संगी थिक,                                आदिमानव काल स’ ई I                                      ने  कियो परतर करत, छथि                              बफ़ादारी मे प्रथम ई II

चोर-डाकू स’ डरय नहि,                                         जोड़ स’ भुकबे करत ई I                                        जान दैयो क’ करत रक्षा ,                                        ने ककरो स’ डरत ई II

  घ्राण शक्तिक धनी ई,                                           दोषी के जा क’ तुरत जकडय I                                पुलिस सेहो हिनक बल स’,                                        पैघ अपराधी के पकडय II 
             

  थिका ई भैरव, युधिष्ठिर-                                       केर ई छथि स्वर्ग साथी I                                      गाडि हिनका नाम स’ जे-                                     दैछ, ओ थिक महापापी II 

Wednesday, July 20, 2016

मुसबा


मुसबा मीठी रानिक कापी,                                                                                                                                 कुट-कुट क’ क’ काटि रहल छनि I                                                                                                                   कान पकड़तनि बिल्ली मौसी,                                                                                                                             पाछू स’ ओ आबि रहल छनि II
पर मुसबा अछि बड़ी चलाक,                                                                                                                               नहि बिल्ली स’ आइ धड़ायल I                                                                                                                         गंध बिलाडिक लगलै जखने,                                                                                                                               बीहडि मे ओ भागि पडायल II
ओ मुसबा मीठिक बस्ता मे,                                                                                                                               चूप-चाप एक दिन घुसि गेल I                                                                                                                             इस्कुल विदा भेली मीठी त’,                                                                                                                               चुन-चुन क’ क’ चट कुदि गेल II
मीठी सोचथि ध्यानमग्न भ’,                                                                                                                             मुसबा जं इस्कुल चलि जैतय I                                                                                                                   कुदिते-फनिते भरिदिन रहितय,                                                                                                                   लुतिका मैडम स’ पढि लैतय II
मैथ बनबितय सबके संग मे,                                                                                                                         हमर टिफिन सबटा खा जैतय I                                                                                                                     गाना गबितय चुन चुन चुन चुन,                                                                                                                     फस्ट दौड़ मे ओ क’ जैतय II
मुदा जं तखने बिल्ली अबितै,                                                                                                                           दौड़ छोडिक’ भागि पडइतै I                                                                                                                           बच्चा सब दौड़’ मे लागल,                                                                                                                           भागि क’ मुसबा जान बचइतै II
मूषक के मारू ने कहियो,                                                                                                                                 देन प्रकृति के थिक ई चुन-मुन I                                                                                                                   हिनक क्रिएशन अद्भुत लागय,                                                                                                                           धरती के शोभा ई टुन-मुन II
गणपति के वाहन मूषक स’,                                                                                                                           प्रेम करै जेबै सब जखने I                                                                                                                             निश्चित हे'ता मुदित गजानन,                                                                                                                     दौड़त चट विद्या सब तखने II                                                                                                                             दौड़त चट...........................II

Tuesday, July 19, 2016

बिल्ली रानी



मीठी ! देखू बिल्ली रानी, लागै अछि ई चतुर सयानी I सदिखन उछल-कूद मे लागल, भरिदिन करय अपन मनमानी II

मुसबा के जखने देखलनि त’, मुँह मे आबि रहल छनि पानी I मुदा नजरि कुतबा पर पडिते, याद अबनि हिनका परनानी II

माछक गन्ध जहां लगलनि त’, दोगे-दोग ससरि क’ ए'ली I छौंकी ल’ मीठी दौडै छथि, कूदि-फानिक’ तुरत पड़ेली II

मम्मी के दूधक बासन पर, हिनकर नजरि रहै छनि लागल I दूधक गंध नाक मे लगलनि, चारू कात नचथि बनि पागल II

गर्म दूध मे मुँह सटलनि त’, जडलनि ठोर करै छथि छटपट I मम्मी के झाडू लगलनि त’, भगली दूम दबाक’ सरपट II

बिल्ली रानी आब कहू यै, नीक अहाँके की लगैत अछि ? मूस, माछ वा दूधक भोजन, मोन अहाँके की भवैत अछि ?

मोनक बात कहै छी ‘मीठी’! मूस माछ ने भावय हमरा I मम्मी हाथक दूध-भात,अनु- पम अमृत सम लागय हमरा II अमृत सम.............II

Monday, July 18, 2016

बजारक भोजन



मीठी आइ कहू की खायब, नोनगर, मिठगर अथवा खटगर I जे खायब से सब टा लायब तरल भूजल आर चहटगर II
लड्डू खाजा रसमलाइ वा, रसगुल्ला के भाव चढल छै I दही जिलेबी सो’नपापड़ी कलाकंद के मांग बढल छै II

नोनगर निमकी चाट समोसा, फुचका पर सब लोक टुटल छै I छोला कटलेट वा आलूचप, बर्गर लग मे भीड़ जुटल छै II

मुदा ए’कटा बात कहै छी, दूषित अछि बाहर के खाना I घ’रक सब किछु शुद्ध रहै अछि, वाह्य बीमारी केर खजाना II

कतबो तेल मसल्ला डालू, करत ने कहियो घ’रक परतर I पौष्टिकता ने भेटि सकै अछि, होटल-भोजन भले हो चरपर II

खूब मलाई मिला मिला क', लाख जतन क' पाबि सकत नहि I जादू जे मम्मीक हाथ मे, स्वाद ओ कहियो लाबि सकत नहि II स्वाद ओ कहियो.......................II