जे किछु अपना नीक लगै अछि ।

"जे किछु अपना नीक लगै अछि,

अनकोलेल परोसू ।

जे नै नीक लगै अछि अपना 

अनका परसब रोकू ।।

आमक तरुसँ झरकबाहि,

जे गाछ बबूरक रोपता ।

जिनगीभरि काँटे बिच रहता 

आमकलेल तरसता!!!"

जे क्यो आदर देथि अहाँके ।

जे क्यो आदर देथि अहाँके अहूँ तनिक सनमान करू । क्षणिक स्वार्थपूर्तिक लेल कहियो, जुनि हुनकर अपमान करू ।। खरचू एक हजार तनिक लेल, ख़र्चल जे एक पाइ अहाँलेल । सेवा जे क्यो कएल कनेकबो, जानक मोह ने हो तिनकालेल ।। यद्यपि निर्धन, अबल, निरक्षर, स्नेहक वर्षण कएल अहाँपर । मूल्य अहाँकेर बुझलनि जे क्यो, तिनका हित सर्वस्व निछावर ।। **************************

जे किछु अपना नीक लगै अछि ।

"जे किछु अपना नीक लगै अछि, अनको से सब परसू । जे नै नीक लगै अछि अपना, अनका जुनि से परसू ।। आमक तरुसँ झरकबाहि, जे गाछ बबूर लगयता, जिनगीभरि काँटे बिच रहता, आमकलेल तरसता!!!" ***************************

अपनापर बिसबास करू

अपनापर बिसबास करू, जुनि भागू देखि समस्याके । ईशक ध्यान धरू निसदिन, जुनि छोड़ू अपन तपस्याके ।। जुनि ताकू अनका दिस कहिओ, जे सदिखन आबि मदति करता । हँ, दोस्त एहन ताकू निश्चय, जे सभतरि संग सतति रहता ।। **************************

ईशसँ अछि प्रार्थना ।

ईशसँ अछि प्रार्थना एतबा कृपा सदिखन करब । रहय ने दुखिया कियो आ दुख सभक सदिखन हरब ।। कष्ट किनको कनिकबो नै होन्हि हमरा कारने । भले हमरा देथु कतबो कष्ट ओ बिनु कारने ।। एहन दिन हमरा दिय' सभदिन करी उपकार अनकर । भले क्यो ऐ लोकके सदिखन करथु अपकार हम्मर ।। हएत जीवन सफल, जँ क्यो- सुखी हमरा कारने । दोसर मुख मुस्कान आयत जखन हमरा कारने ।। 💐💐💐💐💐💐💐💐💐💐💐💐

माया बनाम ज्ञान

"जे कियो मायाक पाछाँ रहत लागल, होइछ नै तकरासँ नमहर कियो पागल । आइ तक नै कियो ओकरा पकड़ि सकला, महा अज्ञानी थिका से नर अभागल ।। जे कियो पग सूर्य दिस प्रारंभ करता, रहत लागल तनिक पाछाँ छाँह हुनकर । होउ सब जिज्ञासु उन्मुख ज्ञान रवि दिस, स्वयं सुख-समृद्धि पाछाँ रहत तिनकर ।।" *************************

नारि

"सहस्रों पुष्प मिलिजुलिक' सुधर माला बनाबै छथि,

सहस्रों दीप मिलिक' आरतिक थारी सजाबै छथि ।

अनंतों बूँद मिलिजुलिक' करथि निर्माण सरिता के,

मुदा एसगरि सुशीला स्वर्ग सम घर के बनाबै छथि ।।

भले सम्पन्नता सुख-शान्तिमय परिवार किनको छन्हि,

भले साक्षर नीरुज बलबान सब लक्षण विकासक छन्हि ।

मुदा जँ नारिके सम्मान नै ओइ गेहमे होइ छन्हि,

तँ नर्के सदृश बूझू गेह से पहरा विनाशक छन्हि ।।"

आत्म दर्शन

ताकै छी मस्जिद गुरुद्वारा मंदिर चर्चो आ जगभरिमे । अनगिन जीवक दिस ध्यान दियौ, भ' जायत दर्शन क्षणभरिमे ।। घिरनासँ घिरने भेटै छै, सेवासँ मेवा प्राप्त करब । जँ दया प्रेम बिलहब सगरो, सबहक हिरदयमे बास करब ।। सेवो नै पूजा हो सबहक, शिवरूप बूझि सबके अइठाँ । एक्के ईश्वर सबहक उरमे, तँ आन कियो नै अछि अइठाँ ।। जँ पूजो नै क' सकय कियो, चुपचाप स्वयंमे पैस जाउ । चितके थिर क' इंद्रिय समेटि, भए मौन हृदयमे बैस जाउ ।।

औंठी

बात बहुत पुरान थीक । सिंदरीमे अभियांत्रिकीक द्वितीय बर्खक छात्र छलहुँ । गर्मी छुट्टीमे गाम आयल छलहुँ । श्रद्धेय स्व0 परम भैया सेहो मोतिहारीसँ गाम आयल छलाह ।

शान्त राखल करू चित ।

शांत राखल करू चित, निर्णय ने धड़फड़ मे करू । जोड़ सँ चिचियाउ नहिं, किछुओ ने हड़बड़ मे करू ।। किछुओ ने हड़बड़ मे करू, हल्ला सतत काजे बिगाड़त । धरू चुप्पी काज सम्हरत, स्वास्थ्य के से'हो सुधारत ।। दुख अहींके पड़त भोग', चित्त जँ नै शांत राखल । सुख सेहो भेटत अहीं के, चित्त के जँ शांत राखल ।। ***********************

प्रारब्ध

होइछ सबसँ नीक हमरालेल जे किछु,

ईशके छन्हि पता सबटा बात से ।

तखन जँ क्यो मँगै छी हुनका सँ किछुओ,

करै छी व्यवधान हुनका काजमे ।।

करी सबटा काज जे प्रारब्ध अछि,

मानिक' आदेश चुप्पे-चाप हुनकर ।

मुदित सदिखन रही अपना हालपर,

यएह सबसँ पैघ पूजा हएत हुनकर ।।

------------- -------- -------- --------- ------

होइछ सबसँ नीक हमरालेल जे किछु, ईशके छन्हि पता सबटा बात से । तखन जँ क्यो मँगै छी हुनका सँ किछुओ, करै छी व्यवधान हुनका काजमे ।। करी सबटा काज जे प्रारब्ध अछि, मानिक' आदेश चुप्पे-चाप हुनकर । मुदित सदिखन रही अपना हालपर, यएह सबसँ पैघ पूजा हएत हुनकर ।। ------------- -------- -------- --------- ------

क्रोधपर विजय

शिष्य अछि क्रोधी स्वभावक गुरुक सम्मुख आबि बाजल- "क्रोध हमरा सतत आबय बना दैछ निछच्छ पागल ।। गुरु! अहँक व्यवहार उत्तम, सतत मिट्ठे टा बजै छी । क्रोध जितने छी, ने कखनो- कटु वचन ककरो कहै छी ।। हमर भाग्यक रेख की अछि? कृपा क' क' ई बतबितहुँ । संगहि अप्पन क्रोध जितबा के रहस सेहो सुनबितहुँ ।।" संत-"अद्याबधि ने अप्पन, रहस किछुओ हम जनै छी । मुदा तोहर भाग्यरेखा- के रहस सबटा जनै छी ।।" -"अहँक शरणागत छी गुरुवर! चरण-रज सँ सब सिखल । कृपा क' क' बता दीतहुँ, भागमे अछि की लिखल?" -"लिलाटक रेखा कहै छौ, आब बेसी दिन ने बचबैं । यैह लीखल छौ जे साते दिनमे तों प्रस्थान करबैं ।।" आन जँ ई बात कहितै, शिष्य हँसिकय टालि दीतय । मुदा गुरुमुख बात, हिम्मति- भेलै नहि जे काटि सकितय? गुरु चरण स्पर्श क' क', शिष्य मुँह लटका क' चलि गेल । ताहि दिन सँ शिष्य केर- व्यवहार साफे क' बदलि गेल ।। प्रेम सबसँ करय, नहिएँ- क्रोध ककरो पर करै छल । भजन-पूजा-पाठ ध्यानेमे सतत लागल रहै छल ।। पूर्वमे व्यवहार उल्टा- केने छल जिनका संगें । माँगि माफी करय लागल- प्रेम ओ तिनका संगें ।। एलै सातम दिवस तँ ओ- गुरुक सोझाँ जाय बाजल- "क्षमा गुरु! आशीष दीय', देह तजबा समय आयल ।।" -"पुत्र! बाजह सात दिन के- कोन विधि सँ तों बितेलह? की तों पूर्वे जेकाँ सबपर, खूब तामस के देखेलह?" -"गानि-गुथिक' सात टा दिन, शेष जिनगी केर पाओल । पाठ-पूजे-ध्यान-प्रेमें, डूबिक' तकरा बिताओल ।। कष्ट देने छलहुँ उरमे पूर्वमे जकरा सभक हम । क्षमा सबसँ माँगि अयलहुँ गेह जा तकरा सभक हम ।।" -"बूझि गेलह मर्म सबटा, मृदुल व्यवहारक हमर । सात दिन सप्ताहमे अछि, तहीमे सबक्यो मरत ।।" शिष्य गुरु-संकेत बुझि गेल, ताप मोनक मे'टि गे'लै । मृत्युभय तँ छल बहन्ना, सार-जिनगिक भे'टि गे'लै ।। *****************************

मुस्की थिक स्वागतक द्वार

त्याग नमता प्रेम सबसँ, सबकियो नै क' सकै अछि । बीज नैसर्गिक गुणक तँ पूर्व जन्मे सँ पड़ै अछि ।। ईश पर बिसबास क' क' करी निज कर्तव्य सबटा । जएह हमरा लेल उत्तम सएह हमरा लेल करता ।। मात्र जन्मे मनुखमे भेल, तएँ ने सबके मनुख बूझी । मनुखता जिनकामे भेटय, असल तिनके मनुख बूझी ।। आँखि मुनिक' जे कियो बिसबास सबपर क' लेता । बान्हि लीय' कसिक' गिट्ठ', एकदिन खत्ता खेता ।। ओढ़ि मानव खाल बहुतो भेड़िया नित रहय उद्यत । नम्रता शिशुता सजनता देखितहिं धरिक' दबोचत ।। मौन मुस्की पुष्पसँ पूजन सकल अभ्यागतक । मौन थिक रक्षा कवच तँ द्वार मुस्की स्वागतक ।। ************************

मर्मके भेदब उचित नहि ।

क्षणिक स्वार्थक लेल जे क्यो दैत छथि तकलीफ अनका । लाभ सांसारिक भले हो, पारमार्थिक हानि तिनका ।। खूब उत्साहें मनाबी, छोट खुशियोके सुअवसर । यएह सम्बल जीवनक थिक, कत' ताकब दीर्घ अवसर ।। अंत नै तृष्णाक अछि, संतोषके सुख होइछ उत्तम ।। भेटल जे प्रारब्धसँ, अछि- सैह सबहक लेल उत्तम ।। अहंता शैतान थिक जे बनाबय दानव मनुजके । नम्रता ब्रह्मास्त्र, बनबय- जे महामानव मनुजके ।। भले कतबो हो मतान्तर, मर्मके भेदब उचित नहि । पड़त गिठ्ठ', बादमे- लौटब त' कहियो मिटि सकत नहि ।। ******************************

मात-पित

मात-पित छथि तीर्थराजे व्यर्थ जुनि बौखल करू । हुनक पूजन आर सेवा अहर्निश लागल रहू ।। घुमि रहल अछि तीर्थमे पर मोन अन्यत्रे घुमै छै । घरेमे सब तीर्थ रहितो व्यर्थ श्रम खर्चा करै छै ।। थिका सज्जन तीर्थ सद्यः दर्शने सँ पुण्य भेटय । तीर्थ के फलमे हो देरी सज्जनक फल तुरत भेटय ।। ****************************

पर्यावरण संरक्षण

प्रकृति संग व्यवहार अनुचित, लोक निश-दिन क' रहल अछि । जेहन करनी तेहन प्रतिफल, ओहो बदला ल' रहल अछि ।। ग्रीष्म धधकाबय जगत के, धाह स' जिबिते जराबय । जाड़ भेल निर्मोह, जीवक- हड्डियो तक के गलाबय ।। कतहु अतिशय वृष्टि, दाही- घ'र आँगन तक दहेलक । कतहु भ' गेल महारौदी, जजातो सबके जरेलक ।। प्रदूषित पर्यावरण अछि, श्वास दुर्लभ भ' रहल अछि । अपन किरदानी स' मानव, प्राण अपनहि ल' रहल अछि ।। गाछ-बिरिछक वृद्धि हो, सब- जीव-जंतुक करी रक्षण । सैह थिक पूजा प्रकृति केर, भ' जेतै धरणी विलक्षण ।।

जोगाड़

आइ दू नवयुवती पुतहु के आपस मे गप्प करैत सुनि खूब हँसी लागल । एक- ' हम ओकरा कहि देलियैक जे चाहे ऐ घर मे तोहर बाप रहतौ वा हम । ' दोसर- ' अहाँक घरबला की कहलक? ' पहिल- ' जानू! इस घर में केवल तुम रहोगी, बूढ़ा चुपचाप गाँव जाएगा । अगर कुछ भी बोला तो 25 जूता मारूँगा । ' दोसर -' हमरो बुढ़िया पेर क' छोड़ि देलक । ई दिय', ओ दिय', चाह दिय', हॉर्लिक्स दिय'..... । पहिल- ' त' की केलिऐ? ' दोसर- ' ओकरे ल'ग मे सब चीज राखि देलिऐक । भोर स' साँझ तक अपस्याँत रहै छलौं । गिलास लाउ, पानि गरम करू, हॉर्लिक्स खसाउ, फेर घोरू...। आब जखन मोन हेतै, पानि गरम क' लेत आ चम्मच स' टन, टन, टन.... क' क' घोरि क' पी लेत ।' पहिल- ' बाह! नीक बुइध लगेलौं, आब अपने गाम भागि जैत । हमहूँ किछु एहने जोगाड़ लगबै छी ।' ............................

प्रेमक डोइर

ध्यान दी मजगूत डोरी- प्रेम के नहिं टूटि पाबय । नहिं जुटय, गिट्ठ' पड़य, जँ फेर सँ ओ जूटि पाबय ।। जँ फेर सँ ओ जूटि पाबय, स्नेह सँ गिट्ठ' मेटाबी । हाथ सँ जँ भ' सकय तँ, किमपि नहिं कैंची चलाबी ।। व्यक्ति जँ हो श्रेष्ठ तँ कटु बात पर नै ध्यान दी । मुदा जँ हो नीच तँ, तै- व्यक्ति पर नै ध्यान दी । **********************

धैर्य

साधनाके कार्यमे, कहियो ने समुचित हड़बड़ी । जँ ने सुस्थिर चित्त राखब, हएत अतिशय गड़बड़ी ।। हएत अतिशय गड़बड़ी, नै धैर्यके कहियो तजी । धैर्ययुत छथि वीर हुनका, जुनि कियो कायर बुझी ।। नओ मासमे गर्भस्थ शिशु, परिपक्व भ' निकलैछ जहिना । चित्तके सुस्थिर भेनहि परिपक्व हो सब साधना ।।

एकटा रोचक कुश्ती प्रतियोगिता

कपरिया मिडिल इस्कूलमे पड़हैत कालक ई घटना थिक । तै समयमे हम छट्ठामे छलहुँ । स्व0 यमुना प्रसाद सिंह प्रधानाध्यापक छलाह । सहायक शिक्षकमे स्व0 घूरन बाबू, स्व0 रामस्वार्थ बाबू, स्व0 भगलू बाबू, मौलबी साहब(नाम नै याद अछि) ... आदि छलाह । यदा-कदा नव शिक्षक सब सेहो पढाब' आबि जाइत छलाह । यमुनाबाबू मिडिले इस्कूलके कैम्पसमे नवका उच्च विद्यालय शुरू कएने छलाह तएँ नव-नव शिक्षक खूब अबैत छलाह । सब शिक्षक के पढाबक लेल मिडिल इस्कूलमे सेहो पठबैत छलथिन्ह । एकसँ एक नीक शिक्षक अयलाह मुदा बेसी दिन नै टीकि सकलाह, दरमाहा नाम मात्र देल जाइत छलन्हि । मुदा हमरा सबके बड्ड लाभ भेल । विद्वान शिक्षक सबसँ पढ़बाक सुअवसर प्राप्त भेल । स्व0 राजकर्ण बाबू, अभिमन्यु बाबू, राजेन्द्र बाबू, प्रताप बाबू... आदि मेधावी आ प्रकांड विद्वान शिक्षक सब बहुत किछु सिखौलनि । एक दिन कुश्ती प्रतियोगिता राखल गेलैक । गामसँ कपरिया जाइत काल भलनीमे एकटा बाबाजी भेटलाह । ओ सबके मनोकामना पूर्तीक मंत्र दैत छलथिन्ह । हमहूँ कहलियन्हि जे आइ कुश्ती लड़क अछि, कोनो मंत्र दिय' । ओ कहलाह जे अहाँ ईशान कोनमे नैऋत्य कोन दिस मुँह क' क' ठाढ़ भ' क' हनुमानजीके ध्यान क' क' कुश्ती लड़ब शुरू करब तँ निश्चय विजय भेटत । इस्कूलमे जखन कुश्ती प्रतियोगिता शुरू भेलैक तँ हमर नाम नै छल । हमरो लड़बाक मोन नै छल आ शिक्षको सब हमरा नै लड़ाब' चाहैत छलाह । एकर कारण ई छल जे हम मेधावी छात्र छलहुँ, फस्ट सेहो करैत छलहुँ मुदा दुब्बर-पातर छलहुँ; कुस्ती लड़ब भुसकौल आ मोट-सोंट सबहक काज मानल जाइत छलैक । करमौलीक मेधानन्द नामक एकटा छात्र हमरे सँ लड़बाक जिद्द क' देलक । हम जँ जँ नै-नै कहियैक ओ तँ तँ जोड़सँ टाल ठोकब शुरू कएलक । आब शिक्षको सब कह' लगलाह आ हमरो नै नै करैत तैयार होम' पड़ल । हम साधुक बात याद क' क' ईशान कोनमे ठाढ़ भ' लड़ब शुरू केलहुँ । कुश्ती प्रारम्भ आ समाप्तिमे मात्र पाँच-दस सेकेंडक अंतर कहक चाही । कियो दखलकैक, कियो नहियों देखलकैक । पता नै हनुमानजी की क' देलथिन्ह! हाथ मिलाबैत देरी छिटकी मारलिऐक से चारूनाल चित्ते खसलैक । ओकर दहिना हाथ टूटि गेलैक आ ओ चिचियाय लागल । ई स्थिति भ' गेलैक जे ओकरा टांगिक' लाब' पड़लैक । एक मास तक खट्टरि हलुआइन ससारिक' हाथ ठीक केलकैक । संभवतः एखनो टेढ़े हेतैक । तकर बादसँ ओ हमरा सँ कुस्ती लड़बाक फेर नाम नै लेलक । आइ एसगर दरबज्जा पर बैसल छी तँ ओ घटना याद पड़ि गेल आ मोन भेल जे अपनो लोकनिकें बाल्यकालक ई रोचक घटना सुना दी । ऐ घटनाक चर्च जखन मेधानन्दक समक्ष एखनो होइत छैक तँ ओकरा खूब हँस्सी लागि जाइत छैक । ************************************************* *

जेहन करता तेहन भोगता ।

अदृश शक्तिक डाङ् कसगर, मुदा देखबामे ने आबय । डाङ् पड़ितो किछु फरक नै, पुनः पापे नीक लागय ।। करथि गणना सभक कृत्यक, फलो तहिना भोग' पड़तै। बबूरक जे गाछ रोपतै, आम तैमे कोना फड़तै ।। जानिक' बइमान सब तँ, लोभमे गै गीर लै अछि । मुदा भोगनाहर ने बाँचय, दैव के से दोख दै अछि ।। जे करत गलती जरूरे, पापके से भोग भोगता । कर्मफल सिद्धांत अविचल, जेहन करता तेहन भोगता ।। **************************

नारियल सम बाह्य दृढ़तम

नीक ********* नीक तकरे बुझी जे निन्दा ने अनकर करय कहियो । जदपि अप्पन त्रूटि लघुतम खेदके प्रगटैछ तइयो ।। पैघ गलतीयो जँ अनकर माफ ओ क' दैछ सदिखन । मदति अनकर करक, ताकथि- सुअवसर छोटो ओ सदिखन ।। मदति यद्यपि करथि, पर- एहसान नै कहियो जनाबथि । जरथि नै अनकर खुशी सँ जश्न हिरदय सँ मनाबथि ।। बूझि अनकर भावना, नै- किमपि ककरो पर हँसै छथि । बात अनकर हृदयके महसूस निज उरमे करै छथि ।। अपन हृदयक ध्वनिक ओ आदर सेहो सदिखन करै छथि । सत्यके संग देथि आ बलवान झूठो सँ लड़ै छथि ।। लेख कविता चित्रकारी गीत-संगीतोमे रुचि छन्हि । सकारात्मक काजमे रत व्यसन सँ अतिशय अरुचि छन्हि ।। आत्मविश्वासे भरल आ बाह्य-अंदर एक छथि, नीक श्रोता प्रखर वक्ता नम्र आ किरतज्ञ छथि ।। प्रकृतिप्रेमी जीवप्रेमी अहिंसक अतिशय सरल, नारियल सम बाह्य दृढ़तम हृदय करुणा सँ भरल ।। ***************************

अहंता आओर प्रेम

अहंता आ प्रेम एक्के- वृक्ष के दू शाख होमय । प्रेम त्यागक लेल आतुर, अहंता लेबाक सोचय ।। अहंता लेबाक सोचय, झुकाओल सबके करै अछि। प्रेम तँ देबाक आकुल सतत ओ नमले रहै अछि ।। जे ने चिखलथि स्वाद प्रेमक प्रेम रस की बूझि सकता । उर तकर रसहीन-उस्सर जे सतत डूबल अहंता ।। बसय सबमे एके ईश्वर, प्रेम सबसँ करी सदिखन । बात ज्ञानक से की बुझता, अहंमे डूबल जे सदिखन ।। अहंमे डूबल जे सदिखन, स्वार्थ पाछाँ रहय पागल । सुधा के की स्वाद बूझत, गोबरक कीड़ा अभागल ।। बात ई कहियो ने बिसरी, ईश सबहक उर बसय । आन क्यो नहि छथि जगतमे, एके ईश्वर सबमे बसय ।। ******************************आ

सत्य-पथ आ मूल्य

जीवनक अदहा अबधि तँ नींदमे बीतैछ सबहक । बँचल अदहा केर अदहा खेलमे बीतैछ सबहक ।। तकर अदहा अवधि के तँ अध्ययनमे सब लगाबय । शेष बाँचल केर बेसी नित्यकर्मेमे बिताबय ।। गप्प-सप हँस्सी-ठहक्का मनोरंजन सँ जे बाँचय । सैह अत्यल्पे अवधि तँ धर्म-कर्मक लेल बाँचय ।। कलह-निंदा-व्यसनमे जुनि क्यो बिताबी ऐ समय के । धर्म-कर्मे-ज्ञान-उपकारे बिताबी ऐ समय के ।। कथू ने ल' क' अबै अछि कथू ने ल' जा सकै अछि । त्याग-जश-आ कीर्ति जिनकर सैह टा बाँचल रहै अछि ।। मात्र स्वप्ने टा ने देखी कठिन श्रम सँ सच बनाबी । स्वप्न के साकार क' क' पार बेड़ा के लगाबी ।। जड़ि ने बिसरी यैह दै अछि खाध-जल आ जीवनक रस । शुष्क जीवन कोन काजक जँ ने बाँचल जीवनक रस ।। अत्यधिक श्रमसाध्य जिनगी समारब अतिशय कठिन अछि । जीवनक रस भेटि गेनहुँ, मनुखता भेटब कठिन अछि ।। नीक संबंधी बनायब, जगतमे अतिशय कठिन छै । मुदा संबंधक निमाहब अहू सँ बेसी कठिन छै ।। लोभ-भय के बसमे कथमपि मूल्य कहियो ने गमाबी । सत्य-पथ निज आचरण के जान दइयो क' बचाबी ।। ****************************

शुक्रिया तै ईश के

शुक्रिया तै ईश के जे, हवा मुफ्ते मे देलनि । आर एतबा ख्याल रखलनि, जलक संग भोजन पठेलनि ।। जलक संग भोजन पठेलनि, व्यर्थ क्यो उपराग दै छनि । जे जरूरति होइछ हमरा, भार सब हुनके रहै छनि ।। जे रहय उपयुक्त जहिया, सैह सबटा भेटल तहिया । रहू अति संतुष्ट सब क्यो, करू ईशक शुक्रिया ।। *********************

निन्दक नियरे राखिए

दाग चेहरा पर देखाबय जखन दर्पण

लगा साबुन क्रीम चेहरा के मलै छी ।

दाग चेहरा स' हटायब लक्ष्य होमय

दोख दर्पण के मुदा कहियो ने दै छी ।।

जँ कियो इंगित करै छथि त्रूटि दिस तँ

होइ हुनक कृतज्ञ निज त्रुटिए भगाबी ।

क्रोध हुनका पर करब नै उचित होयत

करी स्वागत हुनक, मैत्री के बढ़ाबी ।।

बनाक' बढियाँ हुनक आँगन कुटी,

घोर निंदक लोक के नजदीक राखी ।

करथि निर्मल चित्त साबुन पानि बिन,

प्यार करियनु किमपि नै अपशब्द भाखी ।।

आन क्यो नै बुझि पड़त ऐ जगत भरिमे,

जँ अहाँ बुझबैक सबके सदृश अपनहि ।

माथपर रखने रहत सबलोक सदिखन,

बूझि जेतै ओ अहँक हृदयक भाव जखनहि ।।

स्वर्गात् उच्चत्तरः पिता

जननि-जन्मस्थान के परतर ने स्वर्गो क' सकै अछि । मुदा जननी मातृभू स' सतत् ऊपरमे रहै अछि ।। पिता सन्तति लेल सब किछु त्याग लेल तत्पर रहै छथि । जदपि सुत निर्मोह, नै पित- त्याग मोहक क' सकै छथि ।। सकल नर दुनिया मे सबतरि विजय के इच्छा करै अछि । मात्र सुत सँ पराजय के पिता के इच्छा रहै अछि ।। त्याग-इच्छा-मोह तैं, नहि- पित जगह क्यो ल' सकै छथि । मात्र दुनिया टा सँ नहि, पित- स्वर्ग स' ऊपर रहै छथि ।।