बाल-नीलू

माय के चिंतन जेना-

गर्भस्थ-शिशु तहिना बनै अछि I

चित्र मायक कक्ष मे सब,

श्रेष्ठ बालक के रखै अछि II

गर्भ-नीलू, माय आंगन-

मे, शिशुक क्रीड़ा देखै छथि,

-‘हमर शिशु अहिना पड़ैतै,

पकडितौं हम’- ओ सोचै छथि II

कथा अभिमन्यूक प्रचलित-

‘गर्भ स’ रण नीति जानथि ’ I

बाल-नीलू, मातृ-सोचें,

शैशवहिं स’ तेज भागथि II

रहथि नीलू आठ मासक  

घ’र स’ चुपके पड़ाइ छथि I

गे’ट मे तालाक रहितो,

फाँक स’ ओ भागि जाइ छथि II

रहै छी राँचीक हरमू-

कॉलनी, अति मो’न मोहय I

छोट-छिन बाजार, इस्कूल,

फिल्ड, रस्ता, पार्क सोहय II

अनुज सेहो संग मे छथि,

काज किछु-किछु ओ सिखै छथि I

समय के बरबाद बेसी-

काल, गप-सप मे करै छथि II

बाल-नीलू गेट स’

बाहर निकलि गेल एकदिन I

माय भानस-भात मे छलि,

बुझि ने सकली ताइदिनII

थोड़े कालक बाद, आहट-

शिशु के नै सुनि, दौड़ पडली I

भागिक’ मैदान जैतहिं,

फिल्ड मे निज शिशु के देखली II

जान मे ऐल जान, कोरा-

मे उठा शिशु के अनै छथि I

एलहुँ संध्याकाल, सबटा-

बात हमारा स’ कहै छथि II

पकड़लहुँ माथा, आ ईश्वर

के सतत बंदन करै छी I

करू रक्षा देव सबदिन,

अहीं सब शंकट हरै छी II