माया बनाम ज्ञान

"जे कियो मायाक पाछाँ रहत लागल, होइछ नै तकरासँ नमहर कियो पागल । आइ तक नै कियो ओकरा पकड़ि सकला, महा अज्ञानी थिका से नर अभागल ।। जे कियो पग सूर्य दिस प्रारंभ करता, रहत लागल तनिक पाछाँ छाँह हुनकर । होउ सब जिज्ञासु उन्मुख ज्ञान रवि दिस, स्वयं सुख-समृद्धि पाछाँ रहत तिनकर ।।" *************************

नारि

"सहस्रों पुष्प मिलिजुलिक' सुधर माला बनाबै छथि,

सहस्रों दीप मिलिक' आरतिक थारी सजाबै छथि ।

अनंतों बूँद मिलिजुलिक' करथि निर्माण सरिता के,

मुदा एसगरि सुशीला स्वर्ग सम घर के बनाबै छथि ।।

भले सम्पन्नता सुख-शान्तिमय परिवार किनको छन्हि,

भले साक्षर नीरुज बलबान सब लक्षण विकासक छन्हि ।

मुदा जँ नारिके सम्मान नै ओइ गेहमे होइ छन्हि,

तँ नर्के सदृश बूझू गेह से पहरा विनाशक छन्हि ।।"

आत्म दर्शन

ताकै छी मस्जिद गुरुद्वारा मंदिर चर्चो आ जगभरिमे । अनगिन जीवक दिस ध्यान दियौ, भ' जायत दर्शन क्षणभरिमे ।। घिरनासँ घिरने भेटै छै, सेवासँ मेवा प्राप्त करब । जँ दया प्रेम बिलहब सगरो, सबहक हिरदयमे बास करब ।। सेवो नै पूजा हो सबहक, शिवरूप बूझि सबके अइठाँ । एक्के ईश्वर सबहक उरमे, तँ आन कियो नै अछि अइठाँ ।। जँ पूजो नै क' सकय कियो, चुपचाप स्वयंमे पैस जाउ । चितके थिर क' इंद्रिय समेटि, भए मौन हृदयमे बैस जाउ ।।