मल्हू

आइर-धूर पर बाधे-बोने

सगरो ओ छिछिआय रहल I

धीया-पूता बाट-बटोही

सब-क्यो छै ढेपियाय रहल II

मैल-कुचैल झुलंग गंजी पर

कुरता सौंसे छै फाटल I

धोती द’ढ़ कतहु नै लागय,

सौंसे छै चेफड़ी लागल II

चिड़इ-चुनमुनिक खोंता सनके

केस ओकर छै लागि रहल I

कारी कम्मल चेथड़ी-चेथड़ी,

कुकुरक ड’रे भागि रहल II

‘मल्हू’ नाम एकर क्यो कहलक,

बूझि पड़य साफे पागल I

लोक कहय ई सिद्ध, कतेको-

एकरा सेवा मे लागल II

क्यो कहलक बहुतो संतति-सुख,

एकरा आशीषें पौलक I

न’बे कुर्ता-धोती-तौनी-

डोपटा एकरा पहिरौलक I

चीर-चारिक’ सबटा कपड़ा,

ईंटा-पाथर फोड़ि रहल I

फे’रो औघर रूप बनाक’

सौंसे अछि ई दौड़ि रहल II
******19.11.19******