सत्यक मार्ग

होइछ सत्यक मार्ग काँटक, मुदा वैह अछि श्रेष्ठकर । असत् मायाजाल मिठगर, होइछ अतिशय सुगमतर ।। होइछ अतिशय सुगमतर, मिट्ठेमे कीड़ा सब फड़य । मुदा नोनक ल'गमे ने, कोनो कीड़ा सटि सकय ।। बिपति कालोमे सुधीजन, लेथि ने आश्रय असत्यक । कष्टकर अछि यदपि अतिशय, विजय निश्चय होइछ सत्यक!!! 💐💐💐💐💐💐💐💐💐

वर्तमानमे जीबी

काल्हुक चिन्ता मे डुबल, आजुक सुधि बिसराय । काल्हि पुनः आजुक करत, दुखी सतत रहि जाय ।। दुखी सतत रहि जाय, खुशी सब रहू निरन्तर । रहबे करतै चिन्तन मे, दू लोकक अन्तर ।। वर्तमान मे जीबी, करू सुचिन्तन आजुक । सबदिन से पछताय, डुबल चिन्तन जे काल्हुक ।। ***************************