मृत्यु

सरल जनमल, प्रतिष्ठा लेल-

कठिन रस्ता के चुनै छी,

नाम-यश लेल भेल व्याकुल

जाल माया के बुनै छी I

स्वयं बूनल जाल मे फँसि

दया के भिक्षा मंगै छी,

बनल जिनगी दीन-हीनक

मुक्ति के इक्षा करै छी I

जखन ऊर्जा देह मे, सब-

रहै अछि उन्मत्त मग मे,

समय बितने करय पश्चा-

ताप, अतिशय लोक जग मे I

मृत्यु तँ बस मुक्ति थिक

दुनियाँक मायाजाल सँ,

क्यो ने बाँचल रहत जग मे

महाकालक ब्याल सँ I

दान पुन विद्या ने तप हो

पशु सदृश जिनगी तकर अछि,

मरण तँ बस नाम लेल हो

ओ तँ पहिनहिं मरि चुकल अछि II