माया बनाम ज्ञान

"जे कियो मायाक पाछाँ रहत लागल, होइछ नै तकरासँ नमहर कियो पागल । आइ तक नै कियो ओकरा पकड़ि सकला, महा अज्ञानी थिका से नर अभागल ।। जे कियो पग सूर्य दिस प्रारंभ करता, रहत लागल तनिक पाछाँ छाँह हुनकर । होउ सब जिज्ञासु उन्मुख ज्ञान रवि दिस, स्वयं सुख-समृद्धि पाछाँ रहत तिनकर ।।" *************************

नारि

"सहस्रों पुष्प मिलिजुलिक' सुधर माला बनाबै छथि,

सहस्रों दीप मिलिक' आरतिक थारी सजाबै छथि ।

अनंतों बूँद मिलिजुलिक' करथि निर्माण सरिता के,

मुदा एसगरि सुशीला स्वर्ग सम घर के बनाबै छथि ।।

भले सम्पन्नता सुख-शान्तिमय परिवार किनको छन्हि,

भले साक्षर नीरुज बलबान सब लक्षण विकासक छन्हि ।

मुदा जँ नारिके सम्मान नै ओइ गेहमे होइ छन्हि,

तँ नर्के सदृश बूझू गेह से पहरा विनाशक छन्हि ।।"

आत्म दर्शन

ताकै छी मस्जिद गुरुद्वारा मंदिर चर्चो आ जगभरिमे । अनगिन जीवक दिस ध्यान दियौ, भ' जायत दर्शन क्षणभरिमे ।। घिरनासँ घिरने भेटै छै, सेवासँ मेवा प्राप्त करब । जँ दया प्रेम बिलहब सगरो, सबहक हिरदयमे बास करब ।। सेवो नै पूजा हो सबहक, शिवरूप बूझि सबके अइठाँ । एक्के ईश्वर सबहक उरमे, तँ आन कियो नै अछि अइठाँ ।। जँ पूजो नै क' सकय कियो, चुपचाप स्वयंमे पैस जाउ । चितके थिर क' इंद्रिय समेटि, भए मौन हृदयमे बैस जाउ ।।

औंठी

बात बहुत पुरान थीक । सिंदरीमे अभियांत्रिकीक द्वितीय बर्खक छात्र छलहुँ । गर्मी छुट्टीमे गाम आयल छलहुँ । श्रद्धेय स्व0 परम भैया सेहो मोतिहारीसँ गाम आयल छलाह । ओ मोतिहारीक हनुमान सुगरमिल परिसर स्थित हनुमान मंदिरक पुजेगरी छलाह । हुनका संगें हुनक एकटा पैघ मारवारी मित्र सहो आयल छलन्हि । नाम तँ याद नहि अछि, किछु काल लेल मानि लीय' "चौखानी" । हमरासँ तीन दिन पहिने परम भैया आ चौखानी आयल छलाह । तीन दिनमे चौखानी खूब लोकप्रिय भ' गेल छल । चौक-चौराहा, कलम गाछी सागरो घुमैत छल । ओकरा संगे हरदम दस-बीस टा लोक रहैत छलैक । चाह-पान, हाहा-हीही खूब होइत छलैक । हम एलहुँ तँ दरबज्जापर ओकरासँ भेट भेल। परिचय भेल आ हल्का-फुल्का बात भेल । हमरासँ भेट होइत देरी पता नै की जादू भेलैक जे ओ आब हमरा बिना कतहु जेबे ने करय । हमरा बुझाइछ जे यद्यपि ओ गामक लोकसबसँ घुलि-मिलि गेल छल तथापि ओकरा असुरक्षा बोध हरदम रहैत छलैक । ओकरा संग हरदम रह'बलामे सदानंद, महारुद्र, पवन, चन्द्रनाथ, नंदू .. आदि अनेक लोक छलथिन्ह । एहन-एहन अवधूत सबहक बीच ओ परदेशी सीधा-सादा चौखानी कृत्रिम प्रसन्नता देखबैत रहैत छल । हमरासँ भेट होइत देरी ओकरा जानमे जान एलैक । ओ एक दिन हमरा संग एकांतमे दोस्तीक बंधन जोड़लक आ एकटा हीरा जड़ित सोनाक औंठी आँगुरमे पहिरा देलक । भ' सकैत अछि ओकरा समाजमे अहिना दोस्ती लगेबाक प्रथा छल हेतैक, हम शुद्ध ग्रामीण मैथिल समाजमे पलल एकटा अकिंचन विप्र ऐ प्रथासँ साफे अनभिज्ञ अकचकायले रहि गेलहुँ । हमरो किछु देबाक चाही ई सोचबो नै केलहुँ । हँ, एकटा बात मोनमे आयल जे संभवतः हेरेबाक वा चोइर हेबाक डरे ओ हमरा लगमे अपन मूल्यवान धरोहर बिसबास क' क' राखि देलक अछि जे जयबाक काल तक सुरक्षित रहैक । आब चौखानीक मुखपर प्राकृतिक खुशी लौटि गेल छलैक । आब ओ निश्चिंत भ' डोकहर, कपलेसर, खजौली, सुक्खी, उचैठ, कलुआही, मधुबनी.. सौंसे घुमैत रहैत छल । ओ खूब नीक हरमुनियाँ बजाबय आ गीतो खूब नीके गबैत छल । आमक गाछीमे ओकर उन्मुक्त हँसी वर्णनातीत रहैत छल । एक मास ओ रहल, कोना ओ एक मास बीति गेल किछु नै बुझायल । ओ जखन बिदा भेल तँ हम धधहरा गाछीमे छलहुँ । हमरा दिमागमे छल जे ओ भोजनोपरांत बिदा होयत, मुदा ओ जलखै क' क' बिदा भ' गेल । पता चलल जे जाइतकाल ओ हमार खोज केने छल । हमर मोन छटपटा उठल । हम बिना जलखै केनहिं कलुआही लेल दौड़ि पड़लहुँ । बाबू मनो केलनि जे कत' ढोंर हाँक' जायब, ओ चलि गेल होयत । मुदा हमरा किछु नै सुनायल । दौड़ते-दौड़ते कलुआही पहुँचलहुँ । संजोग देखू जे बस लेट छलैक । चौखानी बसमे बैसि गेल छल । बस एक मिनटमे खुज'बला छलैक, सीटी द' देने छलैक । हम चौखानी लग जाक' उदास मोने ओकरासँ हाथ मिलेलहुँ आ आँगुरसँ औंठी निकालि ओकरा द' देलिऐक । ओ खुश भ'क' ल' लेलक आ हम तेजीसँ उतरि गेलहुँ । भगवान हमर इज्जति बचौलन्हि । पता नहि ओ हमरोलेल की की सोचैत छल होयत! गामपर आबि निसाँस छोडलहुँ । बाबू पुछलाह- "भेटल की नहि"? कहलियन्हि-"हँ, भेटि गेल" । मुदा,हुनका कहाँ बूझल छलन्हि जे हमरा माथक बड़का बोझ उतरि गेल छल!! ओ घटना एखनो ओहिना याद अछि ।

शान्त राखल करू चित ।

शांत राखल करू चित, निर्णय ने धड़फड़ मे करू । जोड़ सँ चिचियाउ नहिं, किछुओ ने हड़बड़ मे करू ।। किछुओ ने हड़बड़ मे करू, हल्ला सतत काजे बिगाड़त । धरू चुप्पी काज सम्हरत, स्वास्थ्य के से'हो सुधारत ।। दुख अहींके पड़त भोग', चित्त जँ नै शांत राखल । सुख सेहो भेटत अहीं के, चित्त के जँ शांत राखल ।। ***********************

प्रारब्ध

होइछ सबसँ नीक हमरालेल जे किछु,

ईशके छन्हि पता सबटा बात से ।

तखन जँ क्यो मँगै छी हुनका सँ किछुओ,

करै छी व्यवधान हुनका काजमे ।।

करी सबटा काज जे प्रारब्ध अछि,

मानिक' आदेश चुप्पे-चाप हुनकर ।

मुदित सदिखन रही अपना हालपर,

यएह सबसँ पैघ पूजा हएत हुनकर ।।

------------- -------- -------- --------- ------

होइछ सबसँ नीक हमरालेल जे किछु, ईशके छन्हि पता सबटा बात से । तखन जँ क्यो मँगै छी हुनका सँ किछुओ, करै छी व्यवधान हुनका काजमे ।। करी सबटा काज जे प्रारब्ध अछि, मानिक' आदेश चुप्पे-चाप हुनकर । मुदित सदिखन रही अपना हालपर, यएह सबसँ पैघ पूजा हएत हुनकर ।। ------------- -------- -------- --------- ------

क्रोधपर विजय

शिष्य अछि क्रोधी स्वभावक गुरुक सम्मुख आबि बाजल- "क्रोध हमरा सतत आबय बना दैछ निछच्छ पागल ।। गुरु! अहँक व्यवहार उत्तम, सतत मिट्ठे टा बजै छी । क्रोध जितने छी, ने कखनो- कटु वचन ककरो कहै छी ।। हमर भाग्यक रेख की अछि? कृपा क' क' ई बतबितहुँ । संगहि अप्पन क्रोध जितबा के रहस सेहो सुनबितहुँ ।।" संत-"अद्याबधि ने अप्पन, रहस किछुओ हम जनै छी । मुदा तोहर भाग्यरेखा- के रहस सबटा जनै छी ।।" -"अहँक शरणागत छी गुरुवर! चरण-रज सँ सब सिखल । कृपा क' क' बता दीतहुँ, भागमे अछि की लिखल?" -"लिलाटक रेखा कहै छौ, आब बेसी दिन ने बचबैं । यैह लीखल छौ जे साते दिनमे तों प्रस्थान करबैं ।।" आन जँ ई बात कहितै, शिष्य हँसिकय टालि दीतय । मुदा गुरुमुख बात, हिम्मति- भेलै नहि जे काटि सकितय? गुरु चरण स्पर्श क' क', शिष्य मुँह लटका क' चलि गेल । ताहि दिन सँ शिष्य केर- व्यवहार साफे क' बदलि गेल ।। प्रेम सबसँ करय, नहिएँ- क्रोध ककरो पर करै छल । भजन-पूजा-पाठ ध्यानेमे सतत लागल रहै छल ।। पूर्वमे व्यवहार उल्टा- केने छल जिनका संगें । माँगि माफी करय लागल- प्रेम ओ तिनका संगें ।। एलै सातम दिवस तँ ओ- गुरुक सोझाँ जाय बाजल- "क्षमा गुरु! आशीष दीय', देह तजबा समय आयल ।।" -"पुत्र! बाजह सात दिन के- कोन विधि सँ तों बितेलह? की तों पूर्वे जेकाँ सबपर, खूब तामस के देखेलह?" -"गानि-गुथिक' सात टा दिन, शेष जिनगी केर पाओल । पाठ-पूजे-ध्यान-प्रेमें, डूबिक' तकरा बिताओल ।। कष्ट देने छलहुँ उरमे पूर्वमे जकरा सभक हम । क्षमा सबसँ माँगि अयलहुँ गेह जा तकरा सभक हम ।।" -"बूझि गेलह मर्म सबटा, मृदुल व्यवहारक हमर । सात दिन सप्ताहमे अछि, तहीमे सबक्यो मरत ।।" शिष्य गुरु-संकेत बुझि गेल, ताप मोनक मे'टि गे'लै । मृत्युभय तँ छल बहन्ना, सार-जिनगिक भे'टि गे'लै ।। *****************************