भूलचूकसँ भेल पाप गंगाजी धोबथि

भूलचूकसँ भेल पापके,

गंगा देथि मेटाय ।

अंदर-बाहर शुद्ध भए, 

सकल पाप धुलि जाय ।।

सकल पाप धुलि जाय, 

त्रिपथगाकेँ जग जानय ।

दयामयी मायक महिमा,

सबलोक बखानय ।।

जानिबूझि कृत पाप,

मेटय यमराज शूलसँ ।

गंगा धोबथि पाप,

भेल जँ भूलचूकसँ ।।

***********************

रिश्ता रहत प्रगाढ़, रहि गेने मौने ।

मौने रहि गेने अहँक, 

रिश्ता रहत अटूटि ।

उचितो जँ बाजब अहाँ, 

रिश्ता जायत टूटि ।।

रिश्ता जायत टूटि, 

बाढ़ि उलहनके आयत ।

उकटा-पैंच, दुगोला; 

त्याग पाइनमे जायत ।।

कृत उपकार बिसारि, 

चुप्प बैसू ध' कोने ।

सबसँ प्रेम प्रगाढ़, 

रहत रहि गेने मौने ।।

बुद्धिक उपयोग

बुद्धि थिक अनमोल जगमे,

प्रकृति प्रदत उपहार ।

क्यो कपटी धर्मिष्ठ क्यो, 

होइछ अपन संस्कार ।।

होइछ अपन संस्कार, 

जेहन कुलमे जे जनमय ।

एक बनय अपकर्मी,

दोसर पुण्ये अरजय ।।

लोक सेवाभाव गंगा-

स्नानसँ हो शुद्धि ।

कपट तजि परमार्थमे 

खर्चथु अपन सब बुद्धि ।।

पाहुन थिक सुख-दुख

सुख-दुखके पाहुन बुझू,

नै जिनगिक जंजाल ।

आयब-जायब करत द्वय, 

टिकत ने बेसी काल ।।

टिकत ने बेसी काल,

जगक अनुभूति करायत ।

के अप्पन के आन,

अहाँके नित्य चिन्हायत ।।

अनासक्त रहि भोग, 

रहू विषयासँ प्रतिमुख ।

सीत-रौद समभाव 'कमल',

थिक पाहुन सुख-दुख ।।

ध्यान स्रोतेपर राखू

राखू स्रोतेपर नजरि, निष्ठा राखू संग ।

फिकिर ने निंदकके करू, सतत रहू निःसंग ।।

सतत रहू निःसंग, धर्मके मार्ग ने त्यागी ।

कतबो होबय कष्ट, कर्मसँ दूर ने भागी ।।

कहथि 'कमल' सुनु धीर, अकथ कखनहुँ जुनि भाखू ।

अपन धर्मपर अडिग, नजरि स्रोतेपर राखू ।।

स्वार्थक मेला

दुनियाँक भीड़मे के अप्पन के आन ।

स्वार्थक मेला सब अपने सब आन ।। 

मतलबपर गोर लागत काज भेल भागत दूर ।

मानवता अछि शून्य छल-प्रपञ्च भरपूर ।।

सउँसे अछि गिद्ध पसरल उड़त अकास ।

नजरि छैक मुर्दापर वासनाक दास ।।

ककरोसँ उमेद नहि कखनो पलटि जायत ।

बिसबास जँ क' लेलहुँ सद्यः गाय गटकि जायत ।।

आइ अछि अहाँक संग काल्हि अनकर पछोड़ि ।

सप्पत खायत संग देबक संकटमे देत छोड़ि ।।

भरोस राखी विधातापर जे रचलनि संसार ।

दुनियाँ मात्र माया साँच हुनके टा दरबार ।।

जखन सब संग छोड़त बीच मझधार ।

वएह तखन हाथ पकड़त करत बेड़ापार ।।