सत्यक मार्ग

होइछ सत्यक मार्ग काँटक, मुदा वैह अछि श्रेष्ठकर । असत् मायाजाल मिठगर, होइछ अतिशय सुगमतर ।। होइछ अतिशय सुगमतर, मिट्ठेमे कीड़ा सब फड़य । मुदा नोनक ल'गमे ने, कोनो कीड़ा सटि सकय ।। बिपति कालोमे सुधीजन, लेथि ने आश्रय असत्यक । कष्टकर अछि यदपि अतिशय, विजय निश्चय होइछ सत्यक!!! 💐💐💐💐💐💐💐💐💐

वर्तमानमे जीबी

काल्हुक चिन्ता मे डुबल, आजुक सुधि बिसराय । काल्हि पुनः आजुक करत, दुखी सतत रहि जाय ।। दुखी सतत रहि जाय, खुशी सब रहू निरन्तर । रहबे करतै चिन्तन मे, दू लोकक अन्तर ।। वर्तमान मे जीबी, करू सुचिन्तन आजुक । सबदिन से पछताय, डुबल चिन्तन जे काल्हुक ।। ***************************

बेटी दिवस

बेटी दिवस पर बेटी विहीन एकटा मायक आंतरिक कामना :- हे ईश्वर! हमरा ऐ जीनगीमे बेटी नै देलहुँ आहाँ । मुदा, दोसर जन्ममे हमरा एकटा बेटी जरूर देब । हाँ, एकटा शर्त जरूर अछि- हमरा एहन बेटी देब जे बियाहसँ पहिले हम्मर रहय मुदा बियाहक बाद ओ सासु-ससुरके सेवामे लागल रहय, हमरासँ बेसी सासु-ससुरके सम्मान दिअय । जँ से नै द' सकी तँ नहिएँ देब सएह ठीक ।

ज्ञान

*********** -"बौआ! समय-साल ठीक नै छैक, बरखामे बेसी काल बाहरमे ठाढ़ रहब उचित नहि, अन्दर आबि जाउ, अहाँ सर्दियाह छी, सर्दी-खोंखी-बोखारसँ आइ-काल्हि बाँचिक' रहक चाही ।" -" पापाजी! अहाँ व्यर्थमे चिन्ता करैत रहैत छी; हम आब कोनो बच्चा छी जे अहाँ सदिखन टोकैत रहैत छी? नीक-अधलाहक आब हमरा बढियाँ ज्ञान अछि, अहाँक हरदम टोकब हमरा नीक नहि लगैत अछि ।" -"बौआ! बापक आगू सन्तान सबदिन बच्चे रहैत छैक ।" -"ठीक छैक, बुझि गेलिऐक; आब जाउ अप्पन काज देखू, हम्मर चिन्ता बेसी नै करू ।" ******* जखन बेटा नहि मानैत छन्हि तँ बुड़हा पाँच बरखक पोता चिन्टू के कोरामे ल' क' बाहरमे आबिक' ठाढ़ भ' जाइत छथि । बेटा दौड़िक' आबैत अछि आ चिन्टूके दादाजीक कोरसँ झपटिक' अन्दर ल' जाइत अछि- "बाबूजी! अहाँके किछुओ ज्ञान नहि अछि, चिन्टू सर्दियाह छैक, भिजलासँ ओकरा सर्दी-खाँसी-बोखार भ' सकैत छैक!" -"बौआ! तों ठीके कहैत छह; हमरा किछुओ ज्ञान नहि अछि!!!!" *****************************

अनकर झगड़ामे नै पडू

किछु लोकक आदति होइछ जे अनावश्यक दू लोकक गप्प मे कूदि पड़त, बिना पुछनहिं ओकर झगड़ा फ़रियाब' मे लागि जायत, कहियोकाल लोकक ई आदति बड्ड महग पड़ि जाइछ । सद्य: आँखिक देखल बात कहै छी- लुचबा आ सुटबा दू भाइ अछि, दुनू महालंठ, बेसी काल गामे पर रहै अछि, कहियो काल नोकरी करक लेल परदेसो चलि जाइछ । जावत्काल गाम पर रहैछ भोर स' ल'क' साँझ तक कुस्तम-कुस्ता करिते रहैछ, फेर तुरंत सलाहो भ' जाइछ आ संगें-संग पठशल्ला दिस टहल' विदा होइछ । टोला-पड़ोसिया के कोनो मतलब नहिं, के डेली ओकरा सबहक झगड़ा मे पड़य, ओकरा दुनूक फ्रेंडली-फाइट देखिक' चुपचाप सब मुसका दैछ । आइ मक्खन बाबूक समधि आयल छलथिन्ह, हुनका दुनू भाइक झगड़ा देखल नै गेलनि, कोना आँखिक सोझाँ दुनू के लड़' दित'थिन्ह ! जाक' छोड़ाब' लगलथिन्ह । एखन शुरुए भेल छलैक, कनिको गर्मी नै झड़ल छलैक । दुनू धाकड़ हिनके पर अपन-अपन गर्मी उतार' लागल । से तावत्काल तक गर्मी उतारैत रहल जावत्काल तक ओ बेहोश नै भ' गेला । अस्पताल मे होश एलनि त' कान पकड़ला जे आब दू आदमीक झगड़ा मे नै पड़ब, टाँग-हाथ सब मे प्लास्टर कएल गेलनि जे एक मासक बादे कटलनि । ************************

अनका खुशीमे अप्पन खुशी

शास्त्रकेर उपदेश एतबे परोपकारे पुण्य बाढ़य । जे कियो परपीड़दायक, पाप तकरा ध' पछाड़य ।। कर्मफल सिद्धांत अविचल जेहन करनी तेहन भरनी । नीक के फल नीक आ अधलाह अधलाहेक जननी ।। मुदा जे अनका खुशीमे खुशी अपनो खूब पाबथि । चरण चूमथि खुशी तिनकर, दुःख कोसो दूर भागथि ।। ***********************

चरित्र

छुइत जँ नै ज्ञानसँ तँ, मनुज वा पशुमे की अन्तर! शील गुणसँ रहित जँ तँ, उभयमे बाजू की अन्तर!! दीर्घतम रहितहुँ मुदा जँ, पत्र-पुष्प विहीन तरुवर! लैछ की आश्रय तकर पशु- मनुज वा कोनो गगनचर!! वृक्षके शोभा अतुल जँ, फूल-फल-आ पात घनगर ! चरित-सद्गुण पत्र-पुष्पें- मनुज-तरु हो महासुन्दर!! ****************************