एसगर

धरा पर हम एलहुँ एसगर,

जीवनक यतराक पर छी विदा भेल हम I

मार्ग मे संग भेल-छुटियो गेल बहुतो,

विना रसता अंत के नहि रुकि सकब हम II

भेल भौतिक अंत यतरा, आब नभ मे विदा होइछी I

संग नै क्यों दैछ, सब रहि जैत अइठां I

गेह नारी के कहय तन केर नारी सेहो भागय,

कर्म जं सद्कर्म त’ सद्नाम टा रहि जैत अइठां II

कर्म के सुख लभै अछि सब लोक मिलिक’,

मुदा क्यो फल-भोग लेल नै ऐत आगू I

तैं सतत सद्कर्म सब जन कैल करिऔ,

कर्म फल नहिं बंटय, आबो लोक जागू II

तुरत फल भेटय एखन कलिकाल मे ई बात मानू,

नहि त’ अगिला जन्म मे फल अहीं के भोग’ पडत I

तैं सतत सबलोक हरदम धर्मपूर्वक कर्मरत भय,

निरत परहित सतत रहि पर पीड़ के मेट’ पडत II

ज्ञान त’ निज तपक बल स’ प्राप्त होबय,

तैं ने अनकर आस मे क्यो लोक रहिऔ I

गुरु त’ केवल करय इंगित सत्य रस्ता,

सत्य के आत्मस्थ भ’ सब खोज करिऔ II‍

मैत्री

शत्रु क्यो नै छथि धरणि मे,
जीव मात्रे मित्र छथि मम I
जिन्दगी भरि रहत मैत्री,
हरब सबटा दोस्त के गम II

मित्र के सब कष्ट-उलझन,
आइ स’ हम्मर भ' जायत I
देह दू पर जान एक्केे,
आइ स' हम्मर कहायत II

हम सुदामा दीन दुखिया,
दोस्त मम गोपाल छथि I
दैन्य की क’ सकत, जइठाँँ-
संग नंदक लाल छथि II

हम छी अर्जुन,चक्रधारी-
दोस्त नटबरलाल जिनकर I
जीत के के रोकि पायत,
पीठ पर जँ हाथ तिनकर II

एखुनका मैत्रीक मादे उक्ति बापुक-
" बिना मित्रे छी त’ उत्तम बात जानू I
जँ ने निमहै करू दोस्ती एकटा स’,
तै स’ बेसी जुनि करी ई बात मानू " II

जँ कुमित्रक बात नै भेल रुष्ट छन मे,
भेल जँ अनुकूल त’ छथि तुष्ट छन मे I
यैह लखि ओ हेता बाजल बुझि परै अछि,
दोस्त किछु नै लैछ, देबे टा करै अछि II

मित्र के सब दुख हमर, सुख-
चैन सबटा दोस्त के लेल I
तुच्छतम उपहार भेल जँ,
दोस्त खातिर जान चलि गेल II

प्रकृति स’ सब करू दोस्ती,
स्वार्थ बिनु, देवाक लेल छथि I
तरु, पवन, सरिता, उदधि, छिति,
समर्पित परमार्थ लेल छथि II

आउ सब संकल्प ली,
पर्यावरण रक्षा करब सब I
हैत सार्थक असल मैत्री,
जँ प्रदूषण स’ लड़ब सब II

मूर्ख

अगुन विद्यारहित पर,

 अतिशय घमंडी भाव रखने,

छथि महानिर्धन मुदा,

 विनु अंत के लिप्सा रखै छथि I

मार्ग छनि अन्याय के,

 अपकर्म स’ धनकेर इच्छा,

काज फाजिल ओकाइतो स,’-

ठानि पूरा नहि करै छथि I

थोड़ धन पर पैघ ऐंठन,

 मुदा नहि संतोष हिनका,

ओ थिका अति मूर्ख,

 अनकर वित्त पर हो लोभ जिनका II

वाणी

बात जँ बूझल ने हो त’,                                   रही चुप्पे नीक होइ अछि I                             नीक वाणी जँ ने निकलय,                                 रही चुप्पे नीक होइ अछि II

विद्वता आ मूर्खता किछु,                            बाजनहि लोक जानि पाबय I                               काक-कोइली भेद सब क्यो,                            बोलिए स’ जानि पाबय II

वाणिए थिक विदुष् के बल,                              मूर्ख मौने ने नीक लागय I                        आत्मग्यानिक वाक् उत्तम,                            पशुक चुप्पी नीक लागय II 

पागल

  बात बहुत पुराण, प्रातःकाल घूमक लेल हम,           कार स’ उद्यान मे छी जा रहल I                      शेखपूरा चौक पर डंडा लेने निज हाथ मे,            देखल पागल एकटा अछि घुमि रहल II

  मूँह स’ सीटी बजा-                                 कंट्रोल ट्रैफिक क’ रहल अछि I                   बूझिकय पागल मुसकि सब-                          लोक आगाँ बढि रहल अछि II

 टहलि क’ लौटैत बेर-                              गाड़ी हमर पंचर भ' गेलै I                      सटाक’ पंचर लगाबैत टैर-                             नौ भइए गेलै II

  भीड़ ट्रैफिक केर बेली-                              रोड पर अतिशय बुझाइ अछि I                      हम नवसिखुआ बाम लेन मे,                      कोना आयब नै सुझाइ अछि II

देखै छी सीटी बजाबैत हाथ डंटा वैह पगलेट,               रोकि रखने अछि सकल ट्राफिक के तावत् I           हम घुमाक’ कार ल’ क’ दछिन भागक-                 लेन मे ने नीक स’ चलि गेलहुँ यावत् II

  

मोने मोन किर्तग्य भय                           सैलूट दय हम विदा भयलहुँ I                    चलाक’ अति चेतने-                            आराम स’ डेरा पहुंचलहुँ II

आइ ओइ दिनका सोचै छी कोना क’ ई सब भेलै I         कोना क’ ओ शेखपूरा स’ ओतेक दुर चलि गेलै II

जँ ने रहितय ओहि दिन ओ त’ कोना डेरा मे अबितहुँ I  कोना क’ हम पार होइतहुँ कोना क’ गाड़ी के लबितहुँ II

नै करी उपहास ककरो जानि नै के काज आयत I        बेर पड़ला पर फतिंगो हीत सब जन स’ बुझायत  II

सदृश बानर कूदि-कुदि कंट्रोल ट्राफिक क’ रहल छल I     भ’ सकय धय रूप पागल, पवनसुत हित क’ रहल छल II 

दोसर उगना

देवघर लेल एक बेर,                                       विद्या कका प्रस्थान केलथि,                             संग माझिल पुत्र मुरली,                                   आर काकी सेहो लेलथि II

सोनपुर तक ट्रेन स’,                                       जलयान पहलेजा मे धेलनि,                                महेन्द्रू मे उतरि क’,                                   हनुमान नगरक बाट धेलनि II

ओतय हुनकर पुत्र एक,                               परिवार के संगें रहै छथि,                             
स्नान, भोजन क’ ओत’,                             
प्रस्थान टीशन दिस करै छथि II

भीड़ लखि हिम्मत ने किनको,                               ठसाठस डिब्बा भरल अछि;                            
कोना क’ गाड़ी मे घुसता,
ठाढ़ होमक जगह नहि अछि II 

मात-पित जप क’ रहल छथि,                               माथ ध’ मुरली बैसै छथि;

तही बेर मे सिपाही एक,                             अचानक ओइठाँ अबै छथि II

नमन दूनू वृद्ध के क’,                                     लोकसब के हटाबै छथि;                                 बना रस्ता ल’ गेलथि,                                   आ सीट पर क’ बैसाबै छथि II

फेर मुरली के बजा,                                    
सब बस्तु, मोटरी लदाबइ छथि;                              पुन: मुरली के चढ़ाक’,                                    ट्रेन स' झट उतरि जाइ छथि II

भेला थिर सब कियो त’,                                   अनजान के ताक' लै जाइ छथि;                           
मुदा हुनकर दर्श नहि,                                     ओ कतौ क्षण मे बिला जाइ छथि II

के छला किनको पता नहि,                               शायद शिव नर रूप धायल;
भक्त के दुख देखि दुखहर,                             
स्वयं सबटा दुःख उठायल II

जेना उगना बनि क’ चाकर, 
कैल विद्यापतिक सेवा;                                 
शंभु आरक्षी’क भेषें,
कैल विद्याजीक सेवा II          

मूर्खराज

निज प्रशंसारत स्वयंमुख,                                  पर-प्रशंसा सुनि सकथि नहि I                             सतत परनिंदा निरत,                                     आलोचना निज सुनि सकथि नहि II

                    परोन्नति लखिकय जरनि उर,                              पर-पराभव स’ मुदित छथि I                            बिन बजाओल पञ्च छथि ओ,                           मर्म शास्त्रक किछु बुझथि नहि II                  मुदा सदिखन करथि भड-भड,                         तत्त्व के ने ज्ञान जिनका I                                 अखड़ दिग्विजयी सदृश,                                 पर ज्ञान के ने छूति हिनकाII                           

 विना मंगनहि रायदाता,                                    राय लेब’ मे हो हेठी I                                  राय नीको जे ने लै छथि,                                  मूर्खराजे बुझू तिनका II